හනුමාන් ප්ලොවර්
ලොව පුරා සොයාගන්නා නව ජීවී විශේෂ අතරට ලංකාවෙන් එකතු වූ නව ජීවී විශේෂය “හනුමාන් ඔලෙවියා" (“හනුමාන් ප්ලොවර්") පක්ෂියා යි. කොළඹ විශ්වවිද්‍යාලයේ සත්ව හා පරිසර අධ්‍යයනාංශයේ ජ්‍යෙෂ්ඨ කථිකාචාර්ය ආචාර්ය සම්පත් සෙනෙවිරත්න මහතාගේ නායකත්වයෙන්, උපාධි අපේක්ෂක පර්යේෂණ ශිෂ්‍යයකු වන ජූඩ් ජනිත නිරෝෂන් සහ චීනයේ සන් යාට්-සෙන් විශ්වවිද්‍යාලයේ පරිසර විද්‍යා අංශයේ ආචාර්ය Yang Liu ගෙන් සමන්විත පර්යේෂණ කණ්ඩායම විසින් මෙම සොයා ගැනීම සිදු කර ඇත. පර්යේෂණ කණ්ඩායමට අනුව, මෙම පක්ෂියා මන්නාරමේ සිට රාමේෂ්වරම් දක්වා පෝක් සමුද්‍ර සන්ධියේ පිහිටි දූපත් වල මෙන්ම, යාපනය සහ හම්බන්තොට වියළි පහත් බිම්වල පිහිටි ශුෂ්ක කලාප දාමයන් හා සම්බන්ධ බව නිරීක්ෂණය කළ හැකිය. නව පක්ෂියාගේ විද්‍යාත්මක නාමය නුදුරු අනාගතයේදී ප්‍රකාශයට පත්කරන අතර නව විශේෂයක් ලෙස ජාත්‍යන්තරව ස්ථාපිත වූ හනුමාන් ප්ලොවර් වඳවීමේ තර්ජනයට ලක්ව ඇති විශේෂ සමූහයට වර්ගීකරණය කිරීමට විශාල නැඹුරුවක් පවතී.
